臺灣是毋是愛維持死刑？這是對人權開始予逐家重視以來，民眾上關心ê議題，嘛是一个上蓋有爭議性ê問題，大部份ê臺灣人攏是認為臺灣ê司法應該愛維持死刑，其實我嘛是按呢認為，逐擺我看著新聞咧報一寡社會新聞ê時陣，我攏誠替遐的受害者感到受氣，嘛感覺刣人佮傷害別人ê彼種人實在是真可惡，而且閣認為若是無予in判死刑，遮的人就會浪費人民ê納稅錢，吃免錢ê牢飯。毋過，我聽完這遍ê哲五了後，我發現咱應該愛思考去思考死刑到底是必須愛存在抑是講死刑只是報復心態下ê一種工具。
佇這擺ê哲五當中，演講者楊宗澧予阮看有關邱和順事件ê影片，我佇影片內面看著警察一直不斷逼供犯人，結果邱和順就莫名其妙予人判死刑，佇影片後尾，邱和順講著因為予人關佇監獄內底二十幾年，伊無看過臺灣上懸ê101大樓，嘛毋知影咱定定咧坐ê捷運是生做啥物款，因為予冤枉，關佇監獄內底，人生二十外年ê時間攏浪費佇監獄內，真正是另外一種心酸，這个事件予我想著臺灣進前ê政治犯嘛是莫名其妙就予人掠去關，甚至予銃殺，就算講無予人銃殺ê人尾後予放出來，in心內ê空喙永遠攏袂好起來。
演講者楊宗澧講著：「臺灣司法制度ê進步是來自遮的予冤枉ê人ê犧牲。」但是臺灣司法竟然愛用遐的予冤枉ê人ê性命才會當進步，這是司法方面應該愛好好思考ê一層代誌。臺灣ê冤獄案毋但一件爾爾，所以才會有一寡人認為死刑無應該存在，閣認為這是一个違反人權ê方法，但是另外一爿ê人就認為，刣人就愛付出代價，我原本嘛是徛佇支持死刑ê立場，但是後來我就思考，敢講刣死遮的可惡ê犯人，受害者ê家屬心內真正就會當好過？
支持死刑ê人，認為死刑是一種保障，死刑若是存在，按呢就袂有人去犯法，臺灣就會是一个安全ê社會，不過演講者林淑雅提出一个問題，伊講：「恁感覺會去刣人佮傷害別人ê人，in佇傷害別人ê時陣，敢會因為死刑就毋敢去傷害別人？」這段話真有道理，大部分ê人攏認為死刑會使阻止遐的犯人想欲傷害人ê行為發生，毋過佇遮的人欲傷害別人進前，in通常是袂去想著死刑ê，所以死刑ê嚇驚作用是毋是就無遐爾有效？
楊宗澧講著一个瑞士監獄ê典獄長講：「其實咱人攏真現實，你希望犯人以後出來按怎對待你，咱就按怎對待犯人。」監獄應該是愛教育遐的犯人，予in改頭換面，會當好好仔反省，毋過臺灣ê監獄內底ê犯人，並無予當做是人咧看待，逐家攏向望犯人會當好好重新做人，但是，無共in當做人咧看，in哪有可能會當好好做人。
咱定定攏干焦看著問題發生ê表面，煞無去深入了解為啥物犯人會去傷害別人，尤其是林淑雅尾後講著，咱咧看新聞時，媒體定定攏會無經過查證就報飽一寡無正確ê內容，真濟代誌毋是向媒體報ê按呢，所以咱家己嘛愛有判斷是非能力。
留言列表
