【華麗的假期】
這是一部主要咧講1980年發生佇韓國ê一件軍民流血衝突ê事件ê影片，看煞了後，我發現這部電影佮1947年發生佇咱臺灣ê二二八事件有一寡所在真sio-siāng，仝款攏是政府佮民眾之間ê流血衝突，這種衝突，是因為民眾掠準新ê政權會使乎國家有無仝款而且新ê發展，毋過，煞無疑悟新ê政權竟然為著會使維持政權ê地位，無分是非，用棍仔烏白摃百姓ê身軀佮頭，抑是用銃去四界射無辜ê人民，彼款ê畫面實在是乎人看甲誠心疼，民眾為著想欲爭取民主，犧牲家己ê性命，這種精神實在是使人佩服。
佇影片中，我印象上深ê是其中一句話：「你知影比銃佮炮閣較恐怖ê是啥物？是人。」這是一个上校對一个獨裁者所講ê話，我真認同這句話，是按怎會有像光州事件佮二二八事件這款犧牲遐爾濟人性命ê代誌發生？就是源自獨裁者彼種無考慮別人性命ê自私佮想欲家己掌握所有權力ê痟貪，為著欲維持家己ê地位，就提別人ê性命講耍笑，實在是乎人無法度原諒！
佇電影後尾，看著抗爭ê人民甘願予銃拍死，嘛欲堅持民主ê彼款精神，乎我心內誠感動嘛感覺真悲傷，不管佇韓國抑是佇咱臺灣，咱這馬這个自由ê社會，是用偌濟人ê性命去換來ê，咱真正愛好好珍惜這一切，才袂枉費遮的人ê犧牲！
【牽阮的手】
透過這部影片，會使看著臺灣自光復了後一直到這馬差不多六十年ê歷史，佇這五、六十年中間，發生誠濟影響咱臺灣ê代誌，田朝明醫師佮田媽媽自少年就為著臺灣ê民主咧走傱，投入誠濟民主運動，為著國家ê前途、為著人民ê權利，毋但是田朝明醫師佮田媽媽，嘛有其他關心國家ê人同齊咧拍拚，譬喻講鄭南榕甘願犧牲家己ê性命，為著就是爭取民主，閣有美麗島事件ê人，in嘛是為著臺灣ê民主化咧付出心力，就算予掠去關，就算予判刑，in堅持ê精神猶是一點仔攏無改變，若毋是in遮的人ê努力，我想咱這馬嘛無可能有遮爾自由ê社會。
雖然田醫師尾後干焦會當倒佇病床頂，嘛無法度親像較早仝款為著臺灣民主發聲，但是田媽媽猶原連田醫師ê精神繼續關心臺灣這片土地所發生ê代誌，in對臺灣ê愛佮關心，是逐家攏會使感受著ê，這種精神真使人欽佩，嘛是咱應該愛好好佮in學習ê所在。
看煞影片了後，老師有講著這部影片當時原本欲佇公視播出，毋過因為彼當時ê政權，公視要求愛鉸掉影片內底一寡歷史ê部份，導演莊益增佮顏蘭權袂當接受，甘願解除合約賠錢予電視台，嘛無願意共真實ê歷史鉸掉，這款有家己ê原則ê導演，我實在真尊敬，若毋是in堅持家己ê良心，咱嘛無法度看著這部影片內底誠濟ê歷史，若是毋知影完整ê歷史，咱哪會知影這馬ê民主是按怎來ê，歷史毋但是予咱了解這馬ê咱是偌爾幸福，咱嘛會使透過歷史去反省抑是去感念，按呢才會更加珍惜咱所有ê一切。
【末代叛亂犯】
佇臺灣解嚴了後，就開始有真濟ê人毋管是學生抑是教授甚至社會人士就開始向望政府會當制定一部新ê憲法，毋過對影片內底會使看著，雖然已經解嚴，佇當時ê社會，猶是有親像白色恐怖ê氣氛存在，「台獨會案」就是一个案例，有五个人就按呢依照二條一予調查局掠去判刑，這件代誌發生了後，對當時ê社會來講，是一件使人震驚ê事件，想袂到解嚴ê臺灣看起來已經自由矣，煞發生這款ê代誌。
雖然這馬ê臺灣已經算是民主ê社會，但是佇影片尾後有講著，臺灣ê民主其實閣有誠長ê一段路欲行，因為佇咱這个社會猶是存在一寡種族ê輕視閣有性別ê無平等，若是想欲有真真正正ê民主，我想咱閣愛更加努力，共臺灣改做一个完全民主ê國家。
【好國好民】
佇較早ê時代ê人，因為經歷過真濟外來ê政權，對家己ê身份閣無啥清楚，「我是啥人？」看起來是一个誠簡單ê問題，毋過對真濟臺灣人來講，這是一个有關自我認同ê問題，我是中國人抑是臺灣人？我到底是來自佗位？影片一開始就講著1945年ê臺灣籍日本兵無予日本佮國民政府認同，這予我想起我進前讀ê一本冊─亞細亞的孤兒，冊ê內容嘛是咧講身份認同ê問題，主角佮真濟臺灣人仝款，毋知影到底家己是啥物人。
影片內面有講著幸佳慧ê故事，伊佇外國欲申請信用卡ê時陣，明明國籍ê選項就有「Taiwan」，毋過竟然愛按照護照頂面寫ê「China」來申請，這就反映出咱臺灣佇國外猶是無予人認同，看到這，毋但是伊感覺心疼，我家己嘛感覺心酸，因為就算講咱臺灣這馬誠自由，人民會使家己選總統，咱有咱ê政府，咱認為臺灣就是一个國家，毋過佇臺灣以外ê所在，咱猶是不算是一个國家，但是我認為，比起別人對咱臺灣ê認同，上重要ê是咱對台灣這片土地ê認同。
「咱是小國小民，但是咱是好國好民」這是鄭南榕講ê一句話，雖然講別人凡勢袂認同臺灣是一个國家，但是我相信只要咱對臺灣這片土地非常認同，嘛真驕傲家己是臺灣人，有一工臺灣一定會使成為國際上承認ê國家，欲予別人認同臺灣進前，咱愛先愛臺灣，所以咱愛為著臺灣ê未來閣較拍拚，閣較關心這片土地！
留言列表
