一、
冊名：父親的手提箱-白色歲月裡的生命故事
作者：翁禎霞、鄭漢辰
翕相者：許清河
出版日期：初版一刷2014年12月
出版社：遠景出版事業有限公司
出版機關：屏東縣政府
二、內容介紹：
本冊以訪問捌經歷過白色恐怖ê屏東受難者抑是inê囝兒序細為主，透過二十一个性命故事，乎世人更加了解這段定定予人袂記但是真重要ê恐怖時代。對本冊當中，會看著誠濟毋管是白色恐怖ê當事人抑是inê囝兒心內ê心酸，毋過嘛會當看著in是按怎佇彼款困難ê環境中，用inê堅強佮勇敢，漸漸行出心內ê陰影，重新對這个世界中慢慢揣轉來性命ê意義而且活出家己無仝款ê生活。
三、心得：
對這本冊當中，看著真濟佇彼个白色恐怖時代受著折磨抑是冤枉ê人inê心酸故事，每一个故事雖然頁數無濟，毋過佇inê故事當中，猶是會使感覺著佇彼款ê時代中，遮的人是按怎白白予人冤枉就予掠去關起來，而且閣受著誠濟ê折磨逼供。
雖然逐家予判刑ê狀況攏無仝款，毋過逐家面對這款ê代誌，心內仝款攏足艱苦，有的人是半暝佇厝內咧睏ê時陣，就莫名其妙予人掠去審問，一關就是關十年，大部分ê人生攏浪費佇監獄內底，遮的予冤枉ê人，有的是予陷害ê，有的是因為當時ê政府抱著一个觀念就是「甘願錯殺一百个人，嘛毋放過一个」造成真濟人無辜受牽連，有的人甚至予銃殺，彼是偌爾仔乎人感覺悲哀ê代誌啊！
佇這本冊中，受難者陳景深講著伊ê老爸佇伊予關起來ê期間過身矣，當時ê調查局不但隱瞞in老爸過身ê代誌，閣騙in兜ê人講原本欲tshuā伊去哭路頭，毋過伊家己趁這个機會逃走，乎伊予親人誤會，想著這件代誌這馬伊猶是感覺誠生氣，我嘛感覺彼時陣ê調查局實在是傷過無情理，造成受難者一世人ê遺憾。
「出獄，敢若是受難者ê重生，其實是另外一種磨練ê開始。」這是我佇這本冊當中印象上深ê一句話，因為佇彼个時代，真濟予關起來ê人就算講尾仔予放出來，出獄了後想欲允頭路，但是in有可能因為予關傷久，佮這个世界早就脫離誠久，抑是頭家毋願佮政治犯牽連做伙，造成遮的出獄ê人揣一个頭路攏足困難，想起來實在乎人感覺誠心酸嘛誠悲哀。
另外一位受難者郭獻ê後生郭先生佇訪問尾後講著：「真濟人甘願放棄賠償，嘛毋願閣再面對這段歷史。」準做後來有基金會想欲賠償當時佇白色恐怖時代ê受難者，毋過對郭先生這句話中，會使感覺著猶是真濟人ê心內無法度原諒彼時陣ê政府，白色恐怖對in來講，是想著閣會感覺痛苦佮悲傷，是人生中上想欲放袂記ê一段記持，而且是用金錢賠償嘛無法度彌補ê。
「毋管你是因為啥物原因予關佇遮，你一定愛共這兩年ê mâi la-s(負號)變作 phô la-s(正號)。」這是受難者陳武鎮佇監獄中聽著林書揚先生鼓勵伊ê話，因為林先生ê這句話，乎陳武鎮佇監獄中開始充實家己ê智識，佇退休了後變成一个藝術家，用伊ê創作去紀念這个恐怖時代所發生ê代誌，乎世人透過伊ê藝術去了解而且反省這段歷史。
這本冊我感覺誠特別，因為毋但有文字ê呈現，閣有囥一寡相片是關於受難者留落來ê判決書抑是其他物件，乎我佇讀這本冊ê時陣，會當因為看著白色恐怖ê實物更加深刻去了解白色恐怖，佇這本冊中，嘛會當看著誠濟人佇經歷過遮爾恐怖ê時代了後，抑是真打拚去度過下半世人ê人生，這款勇敢ê精神，是咱應該愛好好學習ê。
留言列表
