【軍教男兒】
這部影片主要咧講一群台灣訓練兵ê故事，當初因為國民黨戰輸，所以成立矣一个「軍士教導團」，主要是欲共台灣少年人召集起來做訓練，為著欲乎遮的少年台灣人攏總自願來加入這个教導團，當時ê政府直直咧宣傳做兵ê種種好處，猶毋過等到遮的少年人加入了後，才發現這一切攏毋是in想ê遐爾仔好，in定定攏會食無飽抑是穿袂燒，當初想欲為著國家作戰，毋過訓練到後來嘛攏無作戰，到尾後遮的少年人親像乎政府創治仝款。
這部影片雖然是用較笑詼ê方式去表達出當時ê做兵情形，但是其實是另外一種ê剾洗。佇彼个時陣ê訓練兵，一心想欲為著國家付出，不得已愛離開家鄉，準做佇訓練ê所在過著艱苦ê日子，嘛無法度想欲轉去厝就會使轉去厝，因為佇彼个時代，政府講啥人民就愛做啥，完全無自由嘛無表達家己意見ê權利，訓練兵ê青春就按呢浪費佇失敗ê政府之下，實在是乎人感覺誠心酸。
【異人的足跡-富田直亮】
白團，對我來講是一个真生份ê名詞，佇看著關於白團ê影片進前，我對白團一點仔印象攏無，毋過佇看完有關白團ê影片了後，才發現原來白團佇台灣欲反共復國ê這段歷史上貢獻誠濟，毋但佇教育方面付出真濟，佇軍事方面嘛是真要求，所以建造出結實ê坑道。富田直亮，白團ê團長，tshuā白團其他ê人做伙為台灣付出心力，因為in對軍事方面ê要求，乎台灣佇戰爭時陣ê傷亡人數佮其他ê國家比起來較無遐嚴重。
我感覺白團ê日本人佮足濟其他捌佇台灣付出ê日本人仝款，譬喻八田與一佮鹿野忠雄，in攏是對台灣付出誠濟ê人，in毋是台灣人，煞為著台灣做真濟ê建設，甚至共台灣當做是第二个家鄉，這種精神咱應該愛好好學習，嘛愛真感謝in所做ê各種建設猶有in對教育ê要求。
【台灣史望春風-白色恐怖的時代】
白色恐怖時代，我相信是逐家攏知影ê歷史，佇彼个時代，啥物話攏袂使亂講，有關政治ê代誌嘛袂使烏白插一跤，一个無細膩，就真有可能會予人掠去關起來，毋但言論無自由，甚至譀古到連無辜ê人嘛攏予掠去，嚴重ê就有可能會予銃殺，真濟人ê性命佇彼段日子內底就按呢無去矣，造成足濟家庭ê家破人亡，一家就按呢無法度團圓，死去ê人有的是予冤枉ê，有的是為著家己ê理想來犧牲，活落來ê人一世人攏佇悲傷中度過，確實乎人感覺誠悲哀。
佇台灣史這門課看著誠濟有關白色恐怖ê影片，每一擺我看著遮的影片抑是紀錄片，我攏感覺心內誠艱苦，我相信經歷白色恐怖時代ê人，一定攏無想欲閣想起彼段烏暗ê日子，對這馬ê咱來講，是無法度真正體會著佇彼款時代ê人ê心內是需要偌濟ê勇敢佮堅強才會使度過。
佇望春風中，主持人尾後講著：「若是無了解過去，哪有可能知影這馬ê光明。」咱這馬這个時代，是偌爾仔自由，遮的自由對咱來講，是本來就應該愛有ê，但是咱這馬享受ê權利，是白色恐怖時代ê人向望會使得著煞無法度得著ê，所以講，咱真正愛非常珍惜咱得著ê自由，因為若是無彼个時代ê人ê犧牲，咱是無可能有這馬偌爾濟ê自由，嘛無偌爾開放ê社會。
【超級大國民】
這部影片看煞了後，我ê心內嘛充滿誠濟ê悲傷，佇彼个白色恐怖時代所發生ê代誌是偌爾予人感覺疼心。男主角因為袂堪得彼時陣ê恐怖刑罰，不得已共主謀供出來，造成陳先生予人銃殺，男主角ê心內對陳先生真袂得過，自伊對監獄予人放出來了後，伊就共伊家己關佇養老院，彼款ê心情是生佇這个自由時代ê咱沒法度體會ê。影片中乎我印象上深ê就是男主角講ê一段話：「佇我十支指甲予人挽掉了後ê某一工，昏迷中，我聽著外口ê戲園傳來快樂ê歌聲，毋過，佇隔壁煞是受刑人ê悽慘叫聲…。」對遮就看ê出來彼个時陣佇監獄內底ê犯人心內ê艱苦是咱這馬所料想袂到ê，就算男主角已經予放出來遐濟年，佇伊經過當時所有有關恐怖時代ê所在，猶是會感覺心內真疼，可見對當時受著殘忍刑罰ê人來講，彼段日子是一段陰影，是想欲袂記攏無法度袂記。
白色恐怖時代，毋但耽誤遮的予掠ê人ê青春，嘛造成真濟原本快樂ê家庭變成家破人亡ê遺憾。所以咱應該愛好好珍惜這馬遐爾自由ê時代，嘛愛好好感念佇白色恐怖中所犧牲ê人，因為咱這馬感覺理所當然ê人權，是因為in所犧牲換來ê。
【台灣史望春風-海外台灣人運動】
為著台灣ê民主，毋但台灣本土ê人民所發起ê民主運動，佇海外嘛有真濟ê台灣人做伙為著台灣ê前途咧拍拚，咱這馬ê台灣會使有遮爾民主ê發展，攏愛感謝當時毋管是台灣本島抑是海外ê人所做ê努力，因為in無顧性命危險為著台灣做伙成立真濟ê台灣獨立社團，而且閣發起大大細細ê民主活動，才有現此時全部人攏認為誠自由而且民主ê台灣。
台灣ê民主化過程是非常無簡單ê，從白色恐怖時代到台灣真正行入民主這段期間，是真濟有理想ê台灣人發起ê運動抑是抗爭所拍拚來ê，雖然中間有人予掠去關當做代價，甚至有人犧牲家己ê性命，毋過佳哉in所付出ê心力，咱這馬才會當有家己主意ê權益。
【美麗島事件】
1979年十二月十日彼工，原本應該是會使表達出家己ê政治立場ê世界人權日，煞演變成一个警察佮民眾之間ê流血衝突，政府用人民納稅ê錢所買來ê武器去攻擊民眾，想起來實在是真悲哀，佇彼暗了後，就有真濟當時ê黨外人士予掠去關，閣予拍甲足悽慘，對彼時ê黨外人士來講，彼是in感覺上烏暗ê一段時間，in無自殺ê機會，因為佇in予監禁ê房間內底，連壁堵攏有真厚ê tshó，所以這款生不如死ê情形乎遮的黨外人士感覺是一種精神折磨，好佳哉佇最後ê判決中無人予判死刑，猶毋過因為彼當時ê政治，發生矣林家血案這件乎人感覺上遺憾ê代誌。
乎我印象上深ê就是蘇貞昌佇訪問中講出ê一段話：「被告無叛亂，無應該予人烏白判刑，台灣人民會用選票來做另外ê審判。」佇1980年代，選民用in ê選票來支持美麗島事件ê相關人士佮in ê家屬，總算是有替遮的人主持公道，嘛代表著台灣民主ê開始。
看著遮爾濟台灣人為著台灣民主拍拚ê故事，我想咱真正愛更加去珍惜咱這馬得著ê自由，愛好好利用咱ê自由去表達出家己ê意見佮參加一寡公民活動，透過咱ê自由去關心這个世界所發生ê代誌，毋通共咱ê自由凊彩拍翸，抑是共自由當作是應該ê，就去造成別人ê困擾。
留言列表
