- 1.受訪者基本資料
(1)名姓：許春男
(2)佮我ê關係：我ê阿公
(3)出生ê年份：1943年
(4)佗位人：雲林縣麥寮鄉人
(5)蹛過啥物所在：阿公佇雲林麥寮出世，後來就tshuā阿媽上北到臺北拍拚趁錢，因為阿公少年ê時陣趁無偌濟錢，所以厝攏是佮人租來ê，伊講伊捌蹛過欲倚十个所在，對臺北圓環搬到永和閣搬到臺灣大學附近，然後閣徙去松山佮板橋，佇板橋ê時閣蹛過幾若位，一直到阮遮的孫仔出世了後，阮規个伙仔就搬到桃園龜山買厝定居一直到這馬。
(6)讀過啥物學校：阿公進前是讀臺灣公立橋頭國民學校(這馬號做雲林縣麥寮鄉橋頭國民小學)，後來因為厝內經濟狀況較無好，就無繼續讀書矣。
(7)食過啥物頭路：阿公到臺北了後頭一个工課就是去做塗水，後來伊去南部嘉義考駕照就予人介紹去駛計程車，然後佮阿媽做伙開一間麵擔仔，一直到搬來桃園了後，就買機器囥佇貨車ê後斗，開始佇庄仔內賣一寡糋ê物件，親像是雞排、牛蒡糋等等，毋但按呢閣有賣蔥仔餅，一直到舊年才退休無做。
(8)其他ê經歷：阿公搬到桃園了後，因為有一片菜園，阿公就定定家己種水果佮菜蔬，伊講家己種ê攏無摻農藥較安全。
- 2.受訪者ê人生中，較大項ê代誌抑是受訪者感覺較值得講ê代誌
阿公講發生二二八事件ê時陣伊猶真細漢，所以家己本身對這層代誌較無啥物印象，毋過伊有聽人講彼當時因為發生衝突死兩萬外人，但是國民黨彼當陣無承認講有死遐濟人，無承認in造成ê錯誤，當時ê國民黨掌握足大ê權力，所以in無共臺灣本島人看在眼內。
佇阿公讀國小ê時陣，國民黨才來臺灣兩年爾爾，就規定袂使講台語，像阿公這種對庄跤來ê囡仔，就被迫愛學講國語，當時ê歌仔戲、布袋戲佮台語歌嘛因為國民黨掌權予禁止，一切有關台語ê物件攏袂當出現，若是唱台語歌就有可能予人掠去關，哪有親像這馬欲唱啥攏會使。
阿公佇做兵ê期間，伊講國民黨ê士官長攏會輕視臺灣人，定定攏會拍本島ê兵仔，因為彼个時代國民黨拍人攏無要緊，有一工阿公佇訓練ê時陣，只是銃拍較慢爾爾，彼个士官長就共阿公ê銃搶走然後射出銃子，結果銃子落佇阿公ê頭殼頂面，好佳哉阿公有戴兵帽仔才無代誌，差一點仔就欲予in拍死，所以阿公自彼个時陣就對國民黨真怨慼，感覺in欺負臺灣人欺負甲傷超過。
另外閣有一層代誌予阿公對國民黨ê怨恨閣較加重，就是伊佮阿媽當時佇亭仔跤做生理，結果就有兩个外省ê管區來揣阿公佮阿媽ê麻煩，毋但反桌閣叫in共麵擔仔收起來莫做，阿媽就去揣里長，趕緊去買一籃水果內底楔紅包現金，過無偌久，警察就去里長in兜，結果看著彼籃水果佮內面ê錢，態度隨一百八十度轉變，就用國語共阿公阿媽講：「以後若是拄著啥物麻煩就來揣我，無問題啦！」阿公講警察若看著錢佮水果就啥物攏無問題，要若無就叫你麵擔仔收起來，生理莫做，遮的警察ê現實予阿公對國民黨印象是誠䆀，嘛對in充滿不滿。
阿公較早ê日子是真艱苦ê，伊佇駛計程車ê時有當時只是路邊小停一下，就予警察開紅單，紅單一開落來，阿公駛計程車一工所趁ê錢就無矣，有時閣會倒貼一寡錢，所以阿公一直對遮的警察抑是國民黨ê人攏真反感。
有關白色恐怖，阿公講彼个期間暗時十點就愛關電火，我ê舅公彼陣愛做兵，因為戒嚴時期有管制，所以舅公十點進前就愛坐船，無，超過十點就無船會使坐矣。佇彼个時代，一點仔自由攏無，啥物委屈攏袂當抗議，所以美麗島事件才會發生，當時掠足濟政治犯送去火燒島，包括黃信介、呂秀蓮等等，彼陣ê社會氣氛是真恐怖ê，佮這馬比起來，這馬真正進步傷濟矣。
雖然這馬ê社會真進步，毋過，阿公佇尾後有講著，有時陣進步嘛是無好ê，伊講這馬ê社會因為科技ê發達，電子產品ê普遍，人佮人之間ê感情是愈來愈疏遠，連行路攏咧看手機仔，所以阿公講傷過進步有時仔嘛毋是一个好ê現象。
- 3.訪談後家己ê心得
透過這擺聽阿公講古ê經驗，我對阿公有更加深入ê了解，較早我攏毋知阿公有啥物款ê過去，想袂到這改佮阿公開講ê過程中，才發現誠濟阿公ê故事，嘛較知影一寡課本內底忽略ê臺灣歷史，聽著阿公講伊較早彼款艱苦ê日子，我就真毋甘阿公，我嘛真佩服阿公，會當佇彼个艱苦時代為著家庭拍拚行過來，雖然較早ê日子真艱苦，猶毋過我感覺阿公猶是真懷念以早ê生活，因為彼段日子，人佮人之間ê感情是足好ê，逐家同齊拍拚，做伙開講泡茶，逐家ê心是貼近ê，彼款現象是這馬這个進步ê社會漸漸咧消失ê。
因為這馬阮遮的孫仔都大漢去外地讀書矣，所以阮攏無啥物時間會使陪伴阿公佮阿媽，但是in猶是真痛阮遮的囝兒序細，每一擺阮遮的孫仔轉去厝ê時陣，阿媽攏會叫阮去in兜食飯，伊攏會攢足濟好食ê物件，講是欲予阮補身體，因為阿媽攏驚阮佇外口為著欲省錢就烏食無好食無濟。
因為阮兜用行ê去阿公in兜才無到五分鐘，所以平常時若是有閒我佮阿兄、阿姊就會去阿公in兜陪阿公阿媽開講，毋過in定定攏是共阮講阮細漢時陣ê代誌，誠少講著in家己，對這就會當看的出來阿公阿媽對阮是非常疼痛ê，阿公已經70外歲矣，阿媽嘛有70歲矣，雖然in身體攏有一寡病疼，但是看著in這馬會當好好仔坐咧佮阮開講，我就感覺真感動嘛足歡喜。
阿公有講著科技ê進步造成人佮人之間ê感情愈來愈疏遠，這點我誠認同，雖然進步是一層好ê代誌，但是顛倒予人減足濟鬥陣ê時間佮機會，所以我嘛希望後擺轉去厝ê時陣，會當聽阿公講閣較濟伊家己ê故事！
留言列表
