和一般參與公民活動ê民眾無仝，阿烽佮淑惠這對翁仔某毋但是到現場參與，閣利用攝影機來實踐認為應該參與ê公民活動，為足濟需要予發聲ê人民透過攝影機來紀錄，予閣較濟ê人會使聽著遮的予掩起來ê聲音。
原本阿烽佮淑惠只是為著欲拍攝紀錄片所以到彰化二林ê相思寮，但是後來聽著當地居民講因為縣政府欲進行中科四期ê開發案，誠濟居民ê家園土地欲乎強制徵收矣，就按呢阿烽和淑惠開始用攝影機實踐公民活動ê行動。
佇這擺ê哲五中，主講者阿烽佮淑惠予阮看了足濟用攝影機錄起來ê影片，看著彰化二林相思寮居民陳情ê畫面，真誠予人感覺足心酸，遐爾濟當地居民是對少年就已經蹛佇這ê村落庄頭，是遐爾仔努力拍拚才創造出美好ê家園，攏已經蹛了五、六十年，煞因為政府ê政策被迫遷移，有一寡家庭甚至有十外个人攏蹛佇厝內，若是被迫遷移，會當去佗位？政府雖然講會補助，猶毋過補助ê遐的錢，根本就無夠予遐的居民搬去新ê厝，那按呢叫遮的土地予徵收ê居民欲按怎才好？
閣來就是國光石化ê問題，阿烽予阮逐家觀看關於國光石化ê影片，內底講著雲林因為設六輕工業區造成誠濟人得著癌症，嘛造成真濟魚仔死亡，原本應該是帶動地方經濟ê產業，煞衍生出遐爾濟ê問題，所有縣市攏毋接受ê國光石化，竟然可能欲佇彰化設廠，彰化佮雲林攏是台灣重要ê農業縣市，真濟人凡勢認為佇雲林、彰化興建國光石化無要緊，但是有想過無？咱食ê米吃的青菜猶有果子大部份攏是對遮的縣市出產，一旦國光石化興建矣，就會汙染水質汙染土地，按呢咱食ê物件就可能有安全上ê疑慮矣。
最後主講者放了有關核電廠ê影片予阮看，核四ê工程十幾年矣一直攏無完成，預算不斷增加，台灣興建核電廠其實非常危險，想看覓，台灣位佇板塊運動頻繁ê地帶，若是核電廠ê區域發生地動矣，那按呢後果肯定無法度想像，而且核能產生ê核廢料，敢講就應該予倒佇無辜ê蘭嶼？
主講人佇講演最後提著：少年人會當為故鄉做啥物？因為像彰化相思寮、雲林、蘭嶼遮的地方大部份攏賰老人抑是囡仔人，少年人攏到外地去揣頭路，所以真濟家鄉ê議題少年人攏無法度參與，因此主講者是鼓勵逐家攏應該多多參與議題。
我嘛認為，身為外縣市ê咱無應該激外外，應該愛好好關心遮的議題，袂使只有當地居民為家園抗爭，因為逐家攏是生佇這个島上ê人民，咱嘛應該好好關心國家所發生ê代誌，愛親像阿烽佮淑惠仝款投入佇議題之中，按呢才是一个有參與公民活動ê人。
留言列表
