verorica0618的部落格

【天馬茶房】

其實看煞了後，我實在感覺誠艱苦，艱苦毋是因為男主角最後過身，嘛毋是因為無快樂ê結果，是因為彼時ê時代予我感覺艱苦。佇日據時代，天馬戲院予規定袂使用台語演台灣戲，但是逐家也是會偷偷仔演，所以攏會準備兩套劇本，見若日本人來巡視，演員攏會馬上換做和服，所有台灣戲曲全部攏愛收起來。

逐个台灣人民毋是無合意台灣戲曲，是予日本人限制，當家己袂當去拑著家己合意ê物件，彼是偌爾痛苦ê經驗!這部影片予阮省思阮應該去尊重別的所在ê文化，嘛予我閣較了解台灣歷史猶有彼時人們ê心情。

【台灣史望春風-二二八事件】

二二八事件會遮爾嚴重就是因為彼時陣台灣ê情勢政治腐敗，而且又閣因為米糧嚴重欠缺，才會衍生出誠濟社會問題，當時ê台灣人民日子是真歹過，所以二二八事件才會由原本只是因為沒收一个賣薰ê人ê薰佮錢演變成全台灣人ê激烈抗爭，對這就會使看出當時ê台灣人生活真正無好過，嘛反映出政府ê無能。

政府為著欲維持治安，發展出戒嚴令，對彼時ê台灣人民來講一點仔自由攏無，嘛因此誠濟有知識ê人攏予冤枉銃殺，這是咱這馬身處自由社會ê人無法度想像的。這集影片最後主持人有講：「咱是對歷史中得著教育，毋是欲對歷史去使弄族群。」這是咱應該愛好好省思ê代誌。

【人權電影-眼淚】

這是一部劇情誠沉重ê電影，佇白色恐怖ê時代，足濟人因為予冤枉所以就予掠去關，佇監獄中受著不人道ê對待，因為受袂起遐的殘忍ê刑罰，足濟人就算無做ê代誌嘛予警察逼到一定愛認罪。若是我生佇彼个時代，我一定會感覺誠恐怖嘛足不安。

男主角雖然佇這部電影中是對予冤枉ê人刑罰ê人，毋過其實後來伊心內嘛誠後悔，我想，彼時ê警察應該嘛是足無願意去做這款代誌。好佳哉這馬ê台灣是一个有人權ê社會，保障咱ê權利，咱應該愛好好仔珍惜。